Naturen på Silda
Silda er ei solrik og grøderik øy med fargerik og stor flora.
På 1970-talet var ein god del av småbruka på Silda nedlagde og det vart sett i gang eit prosjekt med utplanting av sitkagran på jordene som tidlegare var brukt til beite. Dette var eit prosjekt som skulle gje øyfolket tilgang til skog og ved, samt at det skulle vere eit vern mot den trekkfulle nordavinden. Eit statleg prosjekt med gode intensjonar, men som var fullstendig feilslått.
Sitkagrana tok etter kvart over heile øya og vart etter kvart mykje meir i vegen enn til nytte. Med Gerda Silden Totland og Norsk botanisk foreining i spiss vart det i 2018 satt i gang ein aksjon for å fjerne all Sitkagran på Silda. Alle grunneigarane på Silda skreiv under og prosjektet vart finansiert blant anna av fylkeskommunen. Ein flott dugnadsinnsats av bygdefolket og Norsk botanisk foreining med Anders Gunnar Helle i spissen hogde ned mang ei sitkagran på Silda. I 2021 kom skogsmaskinene på plass og tømmeret vart etter kvart frakta vekk både med helikopter og med lastebåt.
Ved å ta turen rundt kulturstien på Silda kan du sjå ein del av dei store hogstfelta der sitkagrana tidlegare stod. Ved kvart infoskilt er det plassert ut store hagesakser. Desse hagesaksene er plassert der slik at ein kan bruke dei til å klippe ned nye sitkagraner som veks opp. Dersom du har energi til overs vert du oppfordra til å ta med dei ei slik hagesaks og bruke den aktivt når du går kulturstien.
Flora på silda
Silda er ei solrik og grøderik øy. Langs vegen og i dei mange flotte velstelte hagane vil du kunne sjå ein fargerik og stor flora. I byrjinga av juli vil du sjå eit fargespel av dei sjeldne. Dersom du er interessert i blomster, planter og farger må du ta turen til Silda. I tillegg til all floraen som veks vilt og den som er planta i hagane, har Velforeininga på Silda satt ut blomsterkasser slik at du kan sitje og nyte desse når du tek ein rast på ein av dei mange benkene som er på øya.
Badeliv på silda
Dersom ein er glad i å bade i sjøen er det mange mogelegheiter for det på Silda. På flytebryggene ved Skjærbuda i søre hamn og i gjestehamna i nordre hamn er det mogeleg å ta seg eit stup om ein ønsker det. Er du av typen som heller vil ta det litt rolegare og vasse sakte og roleg ut i sjøen er den vesle, men idylliske sandstranda «Sandvika» staden for deg. «Sandvika» ligg i søre hamn på Silda og den er ligg like ved vegen, så den er lett tilgjengeleg.
Ein spasertur til moloanlegget
Moloanlegget på Silda er freda av Riksantikvaren og det med god grunn. Moloen er eit kunstverk i seg sjølv og eit byggverk som verkeleg syner anleggsarbeid av stor kvalitet. Moloane er bygde i to etappar, den inste delen er bygd på 1880-talet og den yste er bygd på 1920-talet. Vegen til moloanlegget er lett tilgjengeleg og ein tur på dette anlegget er absolutt å anbefale.
Tur til utsiktspunktet som gjev deg utsikt til store delar av øya og ikkje minst til dei kjente skipsleiene både i vest, nord, sør og innover aust til fastlandet.
Vil trekke fram utsiktspunktet på «Johnshaugen» som ein tur du bør ta. Ein god sti tek deg til dette punktet og turen er både enkel og kort, men samtidig eit høgdepunkt.
Ein liten filmsnutt som syner stien til utsiktspunktet "Johnshaugen" på Silda. Frå dette utsiktsiktpunktet får du ein mektig oversikt over nordre og søre hamn på Silda. Du får også utsikt til skipsleia sørover Ulvesundet, nordover til den heilage øya Selja og ikkje minst får du ei flott utsikt til Sildagapet og skipsleia vestover havet og Stadhalvøya. Ein tur som er verkeleg verdt å ta.
